ខេត្តកែប៖ សាលាបច្ចេកទេសដុនបូស្កូ ខេត្តកែប បានប្រារព្ធកម្មវិធីប្រគល់វិញ្ញាបនបត្រ ដល់និស្សិតជំនាន់ទី៨ អធិបតីភាពដ៏ខ្ពង់ខ្ពស់ពីឯកឧត្តមសោម ពិសិដ្ឋ អភិបាលនៃគណៈអភិបាលខេត្តកែប ព្រមទាំងឯកឧត្តម លោកជំទាវថ្នាក់ខេត្តផងដែរ។ លោក ពក លីសំណាង អធិការសាលាបច្ចេកទេស ដុនបូស្កូ ខេត្តកែប ព្រមទាំងលោកគ្រូ អ្នកគ្រូ នាយកសាលា បុគ្គលិក និងលោកគ្រូអ្នកគ្រូ នៅឆ្នាំសិក្សា ២០១៩-២០២១។
លោកបូជាចារ្យ លី សំណាង អធិការសាលាបច្ចេកទេសដុនបូស្កូខេត្តកែបបានមានប្រសាសន៍ទៅកាន់និស្សិតបញ្ចប់ការសិក្សាឆ្នាំ២០១៩-២០២១ ឲ្យយកជំនាញដែលបានរៀនទៅប្រកបការងារ ដើម្បីអភិវឌ្ឍខ្លួនឯង គ្រួសារ និងអភិវឌ្ឍសង្គមជាតិកម្ពុជា។
លើសពីនេះទៅទៀត លោកបូជាចារ្យ ក៏បានរំលឹកដល់និស្សិតទាំងអស់ឲ្យប្រព្រឹត្តខ្លួនជាមនុស្សល្អ ស្មោះត្រង់ ចេះគោរពមនុស្សជុំវិញខ្លួន គោរពសាសនា និងច្បាប់សង្គម ចៀសឆ្ងាយពីគ្រឿងញៀន។
និស្សិតជំនាន់ទី៩ ដែលបានសិក្សារយៈពេលពីរឆ្នាំ គឺពីឆ្នាំ២០១៩-២០២១ មានចំនួន១៧៩នាក់ ក្នុងនោះនារីចំនួន៨៧នាក់ លើមុខជំនាញចំនួន៤ គឺទំនាក់ទំនងសង្គមនិងប្រព័ន្ធផ្សព្វផ្សាយ គណនេយ្យនិងលេខាធិការ ព័ត៍មានវិទ្យា និងជំនាញអគ្គិសនី។
ឯកឧត្តមសោម ពិសិដ្ឋ អភិបាលនៃគណៈអភិបាលខេត្តកែប បានថ្លែងអំណរគុណដល់សាលាដុនបូស្កូដែលបានមកដំណើរការបណ្តុះបណ្តាលវិជ្ជាជីវៈនៅខេត្តកែបអស់រយៈពេលជាង១០ឆ្នាំមកហើយ។ ក្រោមវត្តមានសាលានេះ យុវជនយុវនារីនៅក្នុងតំបន់បានទទួលនូវចំណេះជំនាញ ជាពិសេសសិស្សដែលចេញពីសាលាដុនបូស្កូខេត្តកែប មានសីលធម៌និងសណ្ឋាប់ធ្នាប់ល្អ។
យ៉ាងណាមិញ ឯកឧត្តម ក៏បានជូនពរដល់និស្សិតដែលបានបញ្ចប់ការសិក្សានាឱកាសនោះ ឱ្យទទួលបានមុខរបរការងារល្អសម្រាប់ជីវិត និងក្លាយជាបុគ្គលល្អនៅក្នុងសង្គម។
គិតមកដល់ឆ្នាំ ២០២១ នេះ សាលាបច្ចេកទេសដុនបូស្កូខេត្តកែបបានបណ្តុះបណ្តាលនិសិ្សតបានជាង ១០០០នាក់មកហើយដោយនិស្សិតដែលបានបញ្ចប់ការសិក្សាពីសាលានេះជាង៩០ភាគរយសុទ្ធតែទទួលបានការងារធ្វើ និងមួយចំនួនទៀតយកជំនាញពីសាលាទៅបង្កើតមុខរបរដោយខ្លួនឯង។
សិស្សដែលមករៀននៅសាលានេះត្រូវតែជាយុវជនយុវនារីក្រីក្រ មកពីខេត្តផ្សេងៗក្នុងប្រទេសកម្ពុជា។
គួរបញ្ជាក់ផងដែរថាសាលាបច្ចេកទេសដុនបូស្កូខេត្តកែប គឺជាសាលាអង្គការក្រៅរដ្ឋាភិបាលមួយ ដែលស្ថិតក្រោមអង្គការមូលនិធិដុនបូស្កូកម្ពុជា របស់ព្រះសហគមន៍កាតូលិក។
សាលានេះបានស្ថាបនាឡើងនៅអំឡុងឆ្នាំ ២០០១ ដោយពេលនោះ មានបង្រៀនជំនាញកាត់ដេរ។
បច្ចុប្បន្នសាលានេះ មានជំនាញធំៗចំនួនបួន ដោយផ្តល់ការសិក្សាដល់សិស្សរយៈពេល២ឆ្នាំ លើមុខជំនាញ ទំនាក់ទំនងសង្គមនិងប្រព័ន្ធផ្សព្វផ្សាយ គណនេយ្យនិងលេខាធិការ
ព័ត៍មានវិទ្យា និងជំនាញអគ្គិសនី។
ក្រៅពីការបណ្តុះបណ្តាលជំនាញ សាលាបច្ចេកទេសដុនបូស្កូខេត្តកែបក៏មានកម្មវិធីមូលនិធិ សម្រាប់កុមារផងដែរ ដោយមូលនិធិនេះ ផ្តោតសំខាន់ចំពោះកុមារនៅក្នុងតំបន់ក្នុងខេត្តនេះ និងតំបន់មួយចំនួនដែលមានកុមារងាយរងគ្រោះ ដូចជាកុមារនៅស្រុកព្រៃកាបាសខេត្តតាកែវ និងកុមារនៅឃុំកោះស្លាស្រុកឈូក ខេត្តកំពត។ លើសពីនេះទៅទៀត មូលនិធិកុមារនេះ ក៏បានបំពេញបេសកម្មទៅខេត្តរតនគិរី ដែលជាខេត្តដាច់ស្រយាលនៅក្នុងប្រទេសកម្ពុជាផងដែរ។
ដូចជាការជួយដល់កុមារដែលគ្មានលទ្ធភាពទៅសាលាបាន មូលនិធិដុន បូស្កូបានផ្តល់កន្លែងស្នាក់នៅ និងម្ហូបអាហារ នៅក្នុងសាលាបច្ចេកទេសដុន បូស្កូខេត្តកែប។ ហើយសំរាប់កុមារ មួយចំនួនខាង មូលនិធិផ្តល់អោយដូចជាសំភារៈសិក្សា និងកង់សំរាប់ធ្វើដំណើរទៅសាលាជាដើម៕
