ខេត្ត កែប ប្រទេសកម្ពុជា _ នាថ្ងៃពុធ ៣កើត ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៧ ខែមិថុនា ឆ្នាំ២០២៦ និស្សិតផ្នែកវិទ្យាសាស្ត្រលេខាធិការនៃសាលាបច្ចេកទេសដុនបូស្កូ ខេត្តកែប បានចូលរួមក្នុង វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាឃុំ/សង្កាត់ ដែលជាកម្មវិធីរៀបចំឡើងដោយអាជ្ញាធរមូលដ្ឋាន ដើម្បីបង្កើនការទំនាក់ទំនង និងការចូលរួមរបស់ប្រជា ពលរដ្ឋក្នុងការអភិវឌ្ឍមូលដ្ឋានប្រកបដោយតម្លាភាព និងប្រសិទ្ធភាព។
វេទិកានេះមានគោលបំណងផ្សព្វផ្សាយអំពីការងារ និងសមិទ្ធផលដែលរដ្ឋបាលឃុំ/សង្កាត់បានអនុវត្តកន្លងមក ព្រមទាំងផ្តល់ឱកាសឱ្យប្រជាពលរដ្ឋ សិស្ស និស្សិត និងអ្នកពាក់ព័ន្ធផ្សេងៗ បានលើកឡើងពីបញ្ហាប្រឈម សំណូមពរ និងមតិយោបល់នានា ដើម្បីរួមគ្នាពិភាក្សារកដំណោះស្រាយ និងរៀបចំផែនការអភិវឌ្ឍន៍សម្រាប់ឆ្នាំបន្ត ដោយមានការចូលរួមពីក្រុមប្រឹក្សាឃុំ/សង្កាត់ មេឃុំ/ចៅសង្កាត់ មន្ត្រីជំនាញពាក់ព័ន្ធ ប្រជាពលរដ្ឋ តំណាងអង្គការ ស្ថាប័ននានា និងនិស្សិតសាលាបច្ចេកទេសដុនបូស្កូ ខេត្តកែប ដែលបានស្តាប់ការបង្ហាញ។
ប្រធានបទសំខាន់ៗដែលត្រូវបានលើកយកមកពិភាក្សា រួមមានការអភិវឌ្ឍផ្លូវថ្នល់ ប្រព័ន្ធទឹកស្អាត អគ្គិសនី សន្តិសុខ និងសុវត្ថិភាព អនាម័យបរិស្ថាន ព្រមទាំងការផ្តល់សេវារដ្ឋបាលផ្សេងៗ ដើម្បីឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋក្នុងមូលដ្ឋាន។
ការចូលរួមរបស់និស្សិតក្នុងវេទិកានេះ មិនត្រឹមតែជាឱកាសសិក្សាពីដំណើរការរដ្ឋបាលសាធារណៈ និងការគ្រប់គ្រងអភិវឌ្ឍន៍មូលដ្ឋានប៉ុណ្ណោះទេ ប៉ុន្តែថែមទាំងជួយលើកកម្ពស់ស្មារតីចូលរួមក្នុងសង្គម ការទទួលខុសត្រូវជាពលរដ្ឋល្អ និងការយល់ដឹងអំពីការអភិវឌ្ឍសហគមន៍ផងដែរ។ ជាចុងក្រោយ បញ្ហា និងសំណូមពរទាំងឡាយដែលត្រូវបានលើកឡើងក្នុងវេទិកាត្រូវបានកត់ត្រា និងបញ្ជូនទៅអាជ្ញាធរពាក់ព័ន្ធ ដើម្បីពិនិត្យ និងដោះស្រាយតាមលទ្ធភាព និងថវិកាដើម្បីអភិវឌ្ឍមូលដ្ឋានកាន់តែមានប្រសិទ្ធភាព និងឆ្លើយតបនឹងតម្រូវការរបស់ប្រជាពលរដ្ឋ។
