ខេត្តកែប ប្រទេសកម្ពុជា _ នៅថ្ងៃទី២៧ ខែសីហា ឆ្នាំ២០២៦ សិក្ខាសាលា (TOT) ក្រោមប្រធានបទ «ប្រាជ្ញាដូនតា ការកសាងសហគមន៍ និងប្រព័ន្ធបង្ការសាឡេស៊ានសម្រាប់យុវជនកម្ពុជា» បានបន្តឈានចូលដល់ថ្ងៃទី២ ដោយផ្តោតសំខាន់លើប្រធានបទ «ក្រមសីលធម៌ គម្រោងនៃជីវិត និងសុខភាពនៃជីវិត»។
ក្នុងសកម្មភាពថ្ងៃទី២ អ្នកចូលរួមបានសិក្សា និងពិភាក្សាអំពីសារៈសំខាន់នៃ ក្រមសីលធម៌ ដែលជាមូលដ្ឋានសម្រាប់ការប្រព្រឹត្តខ្លួនប្រកបដោយការទទួលខុសត្រូវ ការគោរពគ្នាទៅវិញទៅមក និងការរស់នៅក្នុងសង្គមប្រកបដោយសន្តិភាព និងសាមគ្គីភាព។
ជាមួយគ្នានេះ ប្រធានបទ «គម្រោងនៃជីវិត» បានជួយឱ្យអ្នកចូលរួមស្វែងយល់ពីការកំណត់គោលដៅ ការរៀបចំផែនការអនាគត និងការស្វែងរកទិសដៅជីវិតរបស់ខ្លួន ដើម្បីអាចអភិវឌ្ឍសមត្ថភាព និងចូលរួមចំណែកជាវិជ្ជមានក្នុងគ្រួសារ សហគមន៍ និងសង្គម។
លើសពីនេះ ប្រធានបទ «សុខភាពនៃជីវិត» បានផ្តោតលើការយល់ដឹងអំពីការថែរក្សាជីវិតឱ្យមានតុល្យភាព ទាំងផ្នែករាងកាយ ផ្លូវចិត្ត ទំនាក់ទំនងសង្គម និងការរស់នៅប្រកបដោយគុណតម្លៃ។ តាមរយៈការចែករំលែកបទពិសោធន៍ និងសកម្មភាពជាក្រុម អ្នកចូលរួមបានចូលរួមយ៉ាងសកម្ម និងបានបង្កើនការយល់ដឹងអំពីការថែរក្សាខ្លួនឯង និងការជួយគាំទ្រអ្នកដទៃ។
តាមរយៈសិក្ខាសាលានេះ ការបន្តចែករំលែកចំណេះដឹង និងបទពិសោធន៍ ក៏ជាផ្នែកមួយក្នុងការពង្រឹងសមត្ថភាពអ្នកចូលរួម ឱ្យក្លាយជាអ្នកបណ្តុះបណ្តាលដែលអាចផ្សព្វផ្សាយគោលការណ៍ និងតម្លៃល្អៗទៅកាន់យុវជន និងសហគមន៍នាពេលអនាគត។
